ФУДБАЛСКИ  КЛУБ  „ШАР“  ПОЖАРАНЕ

И во моето село се играше фудбал, и тоа добар фудбал. Ако некој се запраша кога за првпат пожаранци заиграле фудбал, тогаш одговорот на ова прашање би можел да се пронајде во содржината на овој блог, исцело посветен на  фудбалскиот клуб „Шар“ од село Позаране.

ФК „ШАР“ ПОЖАРАНЕ беше еден од најстарите фудбалски клубови формирани во гостиварско и воопшто во Полог и истиот преставуваше вистински репрезент на фудбалската традиција во овој полошко-гостиварски фудбалски регион.

НАЈСТАР АМБЛЕМ НА КЛУБОТ

Првите зачестоци на овој клуб датираат уште од далечната 1928 година кога пожарански ентузијасти кои биле на печалба во Белград, ќе формираат  фудбалски клуб на селото, надалеку познат како ФК-„ШАР“ –Пожаране.

Првиот позначаен натпревар на овој клуб пожаранци го имаат одиграно со „БСК“-Београд, а на селскиот стадион во Пожаране, се споменува фудбалскиот натпревар со клубот на тогашните воени власти од Гостивар.. 

Оснивачи на фудбалскиот клуб „Шар“Пожаране-Белград 26.03.1933 година

„ШАР“ Позаране-1932 год.-Белград

ВЕТЕРАНИТЕ НА ФК „ШАР“ ПОЖАРАНЕ

Најпознати пожарански фудбалски ветерани од тоа време се: Виде Петрoски, Десо Нестороски, Лазе Петрoски, Илија Антески, Емин Адемовиќ, Мате Томески, Драге Алексоски, Ѓоко Ѓорѓиески, Влајко Томески, Глишо Попоски, Спирко Антески, Косто Стефаноски со претседателот на клубот Петре Коцески.

ЕКИПАТА НА ФК „ШАР“ ВО ВРЕМЕТО НА  ПОДЕМОТ  НА  КЛУБОТ

Како најдокажана генерација која дала најдобри фудбалски резултати и фудбалери се смета генерацијата  1965 - 1985 година од кои доста играле и во регионални и општински фудбалски лиги во Гостиварскиот, Тетоскиот регион и пошироко.  Најистакнати фудбалски имиња од овој период се: Ѓорѓиески Ѓоко, Петроски Лазе,Ефремомоски Миле,  Илиески Јорде, Адемовиќ Азир, Ристоски Крсте и Десо, Алексоски Трајко , Алексоски Деспот, Томески Тодор, Драге Коцески-Пушкаш, браќата Ќирко и Спасен Андриески, Лазарески Владе, Јорданоски Веле, Даилоски Тике, Тофилоски Слободан, Јованоски Борче, Антески Борче, Данески Томе, Димчески Јоше и Јордан, Ристоски Љубе, Петроски Моме, Боге и Јане, Славе Петроски, Драган Симуноски, Тофил Тофилоски и други,  додека како прв фудбалски судија од ова село се споменува името на Војноски Тодор и неговите следбеници Алексоски Трајко и Ѓорѓиески Витомир.

ЛЕГЕНДИТЕ НА ПОЖАРАНСКИОТ ФУДБАЛ

Најистакнат фудбалски работник од селото е Слободан Тофилоски, под чија диригентска палка се водени повеќе фудбалски клубови како што се : „Шар“-Пожаране,  „Хајдук“-Зубовце, „Вардар“ од с.Вруток  и  „Гостивар“од Гостивар. На последниот клуб и посветува најдол период од својата тренерска кариера. Најголем дострел на овој спортски работник е титулата виши тренер на младинската фудбалска репрезентација на Македонија. 

СЛОБОДАН ТОФИЛОСКИ - фудбалер на  ФК „Шар“

ФУДБАЛСКА ЛЕГИТИМАЦИЈА НА КЛУБОТ

Посебно и засебно во овој текст  издвојуваме простор  за да  искажеме голема благодарност и за сите оние фудбалски играчи кои не беа од село Пожаране а кои го сакаа клубот и играа  со душа и љубов за него без никаков надоместок.

Во 1972 година во село Пожаране а по повод нациолналниот празник „Илинден“ и свеченото пуштање во употреба на селскиот водовод,  на селскиот стандион одигран е натпревар помеѓу „Шар“-Пожаране и републичкиот второлигаш “Тетекс“-Тетово.  Натпреварот заврши нерешено 2:2. 

ЕКИПИТЕ НА ФУДБАЛСКИТЕ КЛУБОВИ „ШАР“ И „ТЕТЕКС“

 Како само со срце се играше фудбал порано. Приказните на мештани од селото од кои некои одамна не се помеѓу нас изнудуваат вистинска возбуда кога ги слушате или во нивно име се прикажуваат од другите .Тука посебно ќе ги спомнам фудбалските натпревари со вечниот ривал ФК -„Хајдук“- од село Зубовце, кој ги преполнуваа стадионите со публика било да се играше на домашен или туѓ терен и за кои до ден денес сеуште се прикажува со голема возбуда и емоции.
Оттогаш до денес поминале многу години, период во кој со право ФК „ШАР“ останува запишан во историјата како првиот фудбалски клуб во гостиварско, а село Пожаране како првото село во кое била донесена фудбалската топка.

НАЈМЛАДАТА ЕКИПА НА ФК „ШАР“ ПОЖАРАНЕ
 Бобан Крунески, Сашо Томески, Зоран Софрески, Часлав Мицкоски, Ненад Андоноски,  Спасе Гегоски, Драгољуб Зизоски, Стојче Јованоски, Деан Петровиќ, Бобан Анѓелкоски , Еро Јованоски

Педесет години подоцна од оснивањето,  или поточно 19.11.1978 година, во село Пожаране, и присуство на поканети гости, Управниот одбор ќе одржи свеќена седница на клубот, а потоа и сеопшта народна везселба проследена со финален натпревар во фудбал По тој повод беа изготвени и посебни покани со кои беа канети на свеченоста еминентни гости од опкружувањето.

 

СВЕЧЕНАТА ПОКАНА НА КЛУБОТ

 За сите пожаранции-љубители на фудбалот, денот недела, кога на селскиот стадион ФК „Шар“ играше првенствен натпревар, преставуваше вистинско доживување. Тогаш прекинуваа сите започнати и недовршени полски и други домашни работи, и мноштво од луѓе: стари, млади, мажи, жени, деца како река се слеваа право кон селскиот стадион од сите страни.. Не се штедеа грлата, се навиваше громогласно, корекно, фер и пред се спортски. Без оглед на крајниот резултат, на крајот на натпреварот спортски беше подадена рака од двете навивачки страни, а потоа заедничко дружење до доцните часови во дворот и просториите на пожаранскиот задружен дом.

СТАДИОНОТ НА ФК „ШАР“ - СЕГА НЕМ СВЕДОК ЗА ПОСТОЕЊЕТО НА КЛУБОТ

Денес ФК „ШАР“ Пожаране не постои односно овој фудбалски клуб од поодамна е згаснат. Само по некоја слика од семејните албуми на пожаранци како и фудбалскиот стадион  кој се наоѓа на самиот влез во селото, преставуваат неми сведоци за постоењето на овој клуб како и за неговите височини и дострели.

______________________________
Боге В и Слободан Т - автори на текстот 

Содржината на овој блог  ќе биде надополнувана и во иднина, онака како што ќе бидат обезбедувани нови и значајни историски податоци за овоj фудбалски клуб.



Блогови со слична содржина:


http://pozaranskiterodovi.blogspot.com/
http://pozaranskicinar.blogspot.com/
http://pozarane.blogspot.com/
http://buckovci.blogspot.com/
http://pozaranskitevodopadi.blogspot.com/
http://pozaranevodenica.blogspot.com/
http://pozaranesokolec.blogspot.com/
http://pozaraneuciliste.blogspot.com/
http://pozaranskiprosvetiteli.blogspot.com/
http://dragevojnoski.blogspot.com/
http://pozaraneselo.blogspot.com/
http://pozaranedrama.blogspot.com/
http://pozaraneprikazna.blogspot.com/
http://pozaranezadruga.blogspot.com/
http://pozaranefudbal.blogspot.com/
http://pozaranelaga.blogspot.com/
http://pozaranepolitika.blogspot.com/
http://pozaranesvadba.blogspot.com/